प्रवाशांना लुटणाऱ्या लोकमान्य टिळक टर्मिनसवर रिक्षा-टॅक्सी चालकांना अटक

लोकमान्य टिळक टर्मिनसवरील काही रिक्षा आणि टॅक्सीचालक जवळच्या अंतरावर जाण्यासाठी प्रवाशांकडून मोठ्या प्रमाणावर भाडे घेऊन त्यांची लूट करीत आहेत. गेल्या अनेक वर्षांपासून ही लूट सुरू असून पोलीस मात्र काहीही कारवाई करत नाहीत. त्यामुळे दिवसेंदिवस प्रवाशांची लूट सुरूच आहे. दरम्यान, दोन दिवसांपूर्वी कुर्ला परिसरात राहणारे मोहम्मद चांद गावी जाण्यासाठी लोकमान्य टिळक टर्मिनसवर आले होते. यावेळी टॅक्सीचालक सतीश सिंह (४०) आणि रिक्षाचालक आशिष सपकाळ (२३) यांनी चांद यांच्याकडून जबरदस्ती ७०० रुपये काढून घेतले. या सर्व घटनेचा व्हीडीओ समाजमाध्यमांवर प्रसारित झाल्यानंतर टिळकनगर पोलिसांनी प्रकरणाची गंभीर दखल घेऊन तत्काळ गुन्हा दाखल केला. प्रवासी चांद यांच्याशी संपर्क साधून पोलिसांनी रिक्षा आणि टॅक्सीचालकाची माहिती मिळवली. त्यानुसार पोलिसांनी तपास करून या दोन्ही आरोपींना चेंबूरमधील सुभाष नगर परिसरातून अटक केली. या आरोपींनी अशाच प्रकारे अनेक प्रवाशांना लुटले असून पोलीस याप्रकरणी अधिक तपास करीत आहेत.