डोंबिवलीत उपायुक्तांच्या सततच्या पाहणीमुळे फेरीवाले गायब; फडके रस्ता, नेहरू रस्ता, रामनगर परिसर फेरीवाला मुक्त

गेल्या आठवड्यात एका जागरूक नागरिकाने आयुक्त जाखड यांना डोंंबिवली पूर्व फडके रोड भागात फेरीवाले बसले असल्याची दृश्यचित्रफित पाठविली होती. आयुक्तांंनी त्याची गंभीर दखल घेऊन दुसऱ्या दिवशी उपायुक्त तावडे यांना डोंबिवलीत पाठवून या सर्व प्रकरणाची चौकशी करण्याचे आदेश दिले होते.

आयुक्त जाखड अचानक रेल्वे स्थानक भागात पाहणी करतात याचीही भिती अधिकाऱ्यांना आहे. त्यामुळे रेल्वे स्थानक भागात फेरीवाले दिसणार नाही याची काळजी अधिकारी घेत आहेत. कल्याण पश्चिम रेल्वे स्थानक परिसरात क प्रभाग कार्यालयाकडून फेरीवाल्यांवर नियमित कारवाई केली जात असल्याने दीपक हाॅटेल ते महमदअली चौक ते शिवाजी चौक रस्ते फेरीवाला मुक्त झाले आहेत. डोंबिवली पश्चिमेतील व्दारका हाॅटेलजवळील शिव वडापावची हातगाडी विष्णुनगर मासळी बाजाराजवळ आणून ठेवण्यात आली आहे. ह प्रभाग हद्दीतील वर्दळीच्या रस्त्यावरील व्यापाऱ्यांनी बहुतांशी पदपथ सामान ठेऊन, पावसाळी निवारे बांधून अडून ठेवले आहेत.