महाड एमआयडीसीत तिघांवर जीवघेणा हल्ला, आठ संशयित अटकेत

रायगड : रायगड जिल्ह्यात महाड एमआयडीसी पोलीस ठाण्याचे हद्दीत गोळीबार झाल्याच्या प्रकरणानंतर आता आणखी एक धक्कादायक घटना समोर आली आहे. महाड एमआयडीसी पोलीस ठाण्याच्या हद्दीत चांढवे बुद्रुक येथे पोलादपूर तालुक्यातील धारवली येथील युवक संशयित आरोपी प्रथम संतोष सकपाळ (वय वर्षे २१) याने व संशयित सात सहकारी आरोपींनी मागील वादाचा राग मनात धरून चांढवे बुद्रुक गावात चाकूने सपासप वार करत तीन जणांना जीवे मारण्याचा प्रयत्न केला आहे.उनित सुनील जाधव (वय २३), विकास गौतम जाधव (वय ३२) आणि दीपेश दीपक पवार (वय २५, सर्व रा. चांढवे बौद्धवाडी) अशा तिघांवर चाकूने सपासप वार केल्याने मोठी खळबळ उडाली आहे. चाकू पोटात भोसकून, पाठीवर चाकूने सपासप वार करत गंभीर जखमी करून जीवे मारण्याचा प्रयत्न केल्याने तालुका हादरला आहे .या प्रकरणी महाड एमआयडीसी पोलीस ठाण्यात संशयित आठ आरोपींच्या विरोधात गुन्हा दाखल करण्यात आला आहे. हा सगळा वाद एका नाजूक प्रकरणातून झाल्याचा प्राथमिक अंदाज महाड एमआयडीसीच्या पोलिसांकडून वर्तवण्यात आला आहे. या प्रकरणी गुन्हा दाखल करण्यात आलेल्या आठही संशयित आरोपींना महाड एमआयडीसी पोलिसांनी अटक केली आहे.हा सगळा थरारक प्रकार महाड तालुक्यात चांढवे बुद्रुक चांदनगर या सार्वजनिक रस्त्यावरती घडला आहे. या सगळ्या धक्कादायक प्रकाराची माहिती मिळताच महाडचे प्रभारी उपविभागीय पोलीस अधिकारी प्रशांत स्वामी, सहाय्यक पोलीस निरीक्षक मारुती आंधळे यांनी घटनास्थळी भेट दिली.या हल्ल्यात जखमी झालेला तरुण उनित जाधव याची प्रकृती गंभीर असल्याने त्याला महाड ग्रामीण रुग्णालय येथे प्रथमोपचार करून मुंबई येथे हलविण्यात आले आहे तर विकास जाधव व दिपेश पवार या दोन तरुणांवर महाड ग्रामीण रुग्णालय येथे उपचार सुरू आहेत.संकेत संतोष सोनवणे, सनी भागुराम सकपाळ, प्रथमेश बायज्या सकपाळ, विकी भीमराव सकपाळ, सुजित सुनील सकपाळ, सुजल भागुराम सकपाळ हे सगळे राहणार धारवली ता. पोलादपूर तर सनी महेंद्र सोनवणे (राहणार वीर तालुका महाड) या संशयित आठ जणांविरोधात हाफ मर्डरचा गुन्हा दाखल करण्यात आला आहे.
भा. दं. वि. कलम ३०७, १४३, १४७, १४८, १४९, ३५२ अन्वये गुन्हा दाखल करण्यात आला आहे. या सगळ्या प्रकरणातील गुन्ह्याचा अधिक तपास महाड एमआयडीसी पोलीस ठाण्याचे सहाय्यक पोलीस निरीक्षक मारुती आंधळे हे करीत आहेत.