मुंबई : चांगला परतावा देण्याचे आमीष दाखवून १४७ गुंतवणूकदारांची सुमारे १७ कोटी ९४ लाख रुपयांची फसवणूक केल्याप्रकरणी मुंबई पोलिसांच्या आर्थिक गुन्हे शाखेने आयात निर्यात करणाऱ्या कंपनीच्या मालकावर गुन्हा दाखल केला आहे. आरोपी वेंकटरामनन गोपाल याने गुंतवणूकदारांना प्रति महिना ७ ते १० टक्के व्याज देण्याचे आमीष दाखवून गुंतवणूक करण्यास सांगितले. आरोपीने गुंतवणूकदारांना सुरुवातीला व्याज दिले, पण नंतर पैसे बुडवले. १४७ गुंतवणूकदारांनी आतापर्यंत पोलिसांकडे तक्रार केली आहे. त्यांची एकूण 17 कोटी 94 लाख रुपयांची फसवणूक झाल्याचे निष्पन्न झाले आहे.
या प्रकरणातील तक्रारदार डॉ. राजीव शर्मा स्त्रीरोगतज्ज्ञ असून ॲन्टॉप हिल फर्टिलिटी ॲण्ड हेल्थ केअर सर्व्हिसेस प्रायव्हेट लिमिटेडचे संचालक आहेत. डिसेंबर २०२१ मध्ये आरोपी वेंकटरामनन गोपालने एका इंग्रजी वृत्तपत्रामध्ये गुंतवणूक योजनेबाबत जाहिरात दिली होती. ती वाचून शर्मा यांनी जाहिरातीत दिलेल्या मोबाइल क्रमांकावर संपर्क साधला. मूळचे चेन्नईतील रहिवासी असलेले गोपालन यांनी आपण जीव्हीआर आयात व निर्यात कंपनीचे मालक असल्याचे सांगितले होते. त्या कंपनीचे कार्यालय मुंबईतील सांताक्रूझ (पूर्व) येथे असून गेल्या पाच वर्षांपासून कंपनी सिंगापूर, दुबई, मलेशिया सांरख्या देशांमध्ये फळे, भाज्या, सुका मेवा, मसाल्यांची आयात-निर्यातीचा व्यवसाय करीत असल्याचे तक्रारदारांना सांगण्यात आले होते. तक्रारीनुसार, आरोपीने डॉक्टर शर्मा आणि त्यांच्या आईला त्यांच्या कंपनीत गुंतवणूक करण्यास प्रवृत्त केले. त्यांच्या व्यवसायाच्या योजना समजावून सांगताना एक वर्षासाठी १० लाख रुपये जमा केले तर त्या बदल्यात त्यांना दरमहा ७ हजार रुपये व्याज मिळेल, असे आमिष दाखवण्यात आले. गोपालनच्या सांताक्रूझ (पूर्व) कार्यालयाला भेट दिल्यानंतर आणि त्यांची ओळखपत्रे तपासल्यानंतर डॉ. शर्मा आणि त्यांच्या आईने योजनेत गुंतवणूक करण्याचे मान्य केले.
पुढे त्यांचा विश्वास बसल्यानंतर त्यांनी २०२२ मध्ये गोपालनच्या कंपनीत ७६ लाख रुपयांची गुंतवणूक केली व त्याबाबत कागदोपत्री करारही केला. तक्रारदारांना जानेवारी ते डिसेंबर २०२२ या कालावधीत व्याजाची रक्कम देण्यात आली. त्यानंतर रक्कम येणे बंद झाले. शर्मा यांच्याप्रमाणे इतर गुंतवणूकदारांची फसवणूक झाल्याचे त्यांच्या लक्षात आले. त्यानंतर अनेक गुंतवणूकदारांनी एकत्र येऊन पोलिसात तक्रार दाखल केली. वाकोला पोलीस ठाण्यात शनिवारी याप्रकरणी गुन्हा नोंदवण्यात आला. त्यानंतर पुढील तपासासाठी हे प्रकरण आर्थिक गुन्हे शाखेकडे वर्ग करण्यात आले. गोपालनविरोधात याप्रकरणी फसवणूक व फौजदारी विश्वासघात केल्याप्रकरणी गुन्हा दाखल करण्यात आला आहे.
