गृहमंत्री महोदय, कुठे नेऊन ठेवलाय आपला महाराष्ट्र? संजय राऊत यांचे ट्विट, फडणवीसांवर निशाणा

नाशिकसारखे तीर्थक्षेत्र ड्रग्ज आणि अंमली पदार्थाच्या विळख्यात अडकत चालल्याने शिवसेना याविरोधात मैदानात उतरली. 20 ऑक्टोबर रोजी शिवसेना (उद्धव बाळासाहेब ठाकरे) खासदार संजय राऊत यांच्या नेतृत्वाखाली इशारा मोर्चा काढण्यात आला. ‘तरुण पिढी वाचवूया, ड्रग्जमुक्त नाशिक करुया’ असे आवाहन यावेळी करण्यात आले. याच मुद्द्यावरून आता खासदार संजय राऊत यांनी ट्विट करत गृहमंत्री देवेंद्र फडणवीस यांना धारेवर धरले आहे.

रविवारी सकाळी खासदार संजय राऊत यांनी विविध वृत्तवाहिन्यांवरील ड्रग्जसंदर्भातील बातम्यांचा एक व्हिडीओ शेअर केला. नाशिकसह विद्येचे माहेरघर समजले जाणारे पुणेही ड्रग्जच्या विळख्यात अडकत चालल्याचे आणि संपूर्ण महाराष्ट्रात अंमली पदार्थांची विक्री, तस्करी आणि सेवन करण्याचे प्रमाण दिवसेंदिवस वाढत असल्याचा उल्लेख यात करण्यात आला आहे. त्यामुळे राज्याची अवस्था ‘उडता महाराष्ट्र’ होते की काय असे भयानक चित्र आहे.

हे वाचा -बॉम्बस्फोटांवेळी दाऊद भाजपचा अध्यक्ष होता का? उद्धव ठाकरे यांचा सणसणीत टोला

याच मुद्द्यावरून खासदार संजय राऊत यांनी देवेंद्र फडणवीस यांच्यावर निशाणा साधला. ‘कुठे नेऊन ठेवलाय आपला महाराष्ट्र? गृहमंत्री महोदय, फालतू राजकारणातून वेळ मिळाला तर जरा इकडे लक्ष द्या’, असे ट्विट खासदार संजय राऊत यांनी केले आहे. या ट्विटमध्ये गृहमंत्री देवेंद्र फडणवीस यांनाही टॅग केले आहे.