बिहारमधील खळबळजनक घटना ,अंदाधुद गोळीबार, जमिनीच्या वादातून शेतातच बाप लेकाला संपवलं;

बिहारमधील अराहमध्ये जमिनीच्या वादातून दोघांची हत्या झाल्याची घटना समोर आली आहे. मंगळवारी सकाळी शेतात पीक काढत असलेल्या कुटुंबावर आरोपींनी गोळीबार सुरू केला. त्यानंतर गोळी लागल्यामुळे बाप लेकाचा मृत्यू झाला आहे. दोन एकर जमिनीच्या वादातून ही हत्या करण्यात आल्याचं सांगण्यात येत आहे.

बिहारमध्ये अराहमध्ये दोन एकर जमिनीसाठी दोघांची हत्या करण्यात आली आहे. सशस्त्र हल्लेखोरांनी बाप-लेकाची गोळ्या झाडून हत्या केली आहे. मृतक त्याच्या कुटुंबीयांसह शेतात गव्हाचे पीक काढत  होते, तेव्हा ही घटना घडली. गावातील दहा-बारा लोक शस्त्रांसह आले. त्यांनी संपूर्ण कुटुंबावर अंदाधुंद गोळीबार सुरू केला. या गोळीबारात दोघांचा मृत्यू झाला आहे.

ही घटना उदवंतनगर पोलीस ठाण्याच्या हद्दीतील रघुनीपूर गावात घडली. ६५ वर्षीय रामधर आणि त्यांचा मधला मुलगा मुकेश कुमार सिंग अशी मृतांची नावे आहेत. मृत रामधर याच्यावर याआधी खुनाचा आरोप  होता. दोन महिन्यांपूर्वीच तो जामिनावर तुरुंगातून बाहेर आला असल्याची माहिती मिळतेय.

घटनेची माहिती मिळताच पोलिसांनी घटनास्थळ गाठले. त्यांनी मृतदेह ताब्यात घेऊन शवविच्छेदनासाठी पाठवले आहेत. पोलीस अधिकारी माहिती मिळताच तातडीने घटनास्थळी  पोहोचले. भरदिवसा घडलेल्या या घटनेनंतर गावामध्ये वातावरण तणावपूर्ण आहे. पोलीस या प्रकरणाचा तपास करत आहेत. या घटनेबाबत सांगितलं जात आहे की, रघुनीपूर गावात रामधर सिंहचा गावातील काही लोकांशी दोन एकर जमिनीवरून वाद सुरू होता. यापूर्वीही या जमिनीवरून खून आणि मारामारीच्या घटना घडल्या होत्या.