ACBच्या जाळ्यात लाचखोर महिला वैद्यकीय अधिकारी; आरोग्य सेविकेमुळे फुटले बिंग

ठाणे : वार्षिक शेरे चांगले लिहिण्यासाठी आणि वरिष्ठांकडे तक्रार न करण्यासाठी आरोग्य सेविकेकडून ११ हजारांची लाच घेणाऱ्या शहापूर तालुक्यातील पिवळी प्राथमिक आरोग्य केंद्रातील वैद्यकीय अधिकारी डॉ. रेखा सोनावणे यांना ठाणे लाचलुचपत प्रतिबंधक विभागाने अटक केली. त्यांच्याविरुद्ध वाशिंद पोलिस ठाण्यात भ्रष्टाचार प्रतिबंधक कायद्याखाली गुन्हा दाखल झाला आहे.

प्राथमिक आरोग्य उपकेंद्रामार्फत किशोरवयीन मुली-मुलांना सभा घेऊन आरोग्यविषयक मार्गदर्शन करण्यात येते. यावेळी मुलांना देण्यात येणारा चहा, नाश्ताच्या खर्चासाठी जिल्हा परिषदेच्या आरोग्यविभागाकडून निधी उपलब्ध केला जातो. त्यानुसार पिवळी प्राथमिक आरोग्य उपकेंद्रासाठी २२ हजार रुपायांचा निधी प्राप्त झाला होता. डॉ. रेखा सोनावणे यांनी हा निधी खर्च केल्याच्या बेकायदा पावत्या याच आरोग्य केंद्रातील एका आरोग्य सेविकेला सादर करून बिल काढण्यास सांगितले. शिवाय निधीतील अर्धी रक्कम ११ हजार रुपये देण्यास सांगितले होते. मात्र, आरोग्य सेविकेने हे काम करण्यास नकार दिल्याने डॉ. सोनावणे यांनी तुमचे वार्षिक गोपनीय शेरे लिहिण्याचा अधिकार मला आहे. त्यामुळे वार्षिक गोपनीय शेरे खराब करून तुम्ही आरोग्य केंद्रामध्ये व्यवस्थित काम करत नाहीत. तुमचा वरिष्ठांना अहवाल सादर करीन. वार्षिक शेरे चांगले लिहिण्यासाठी तसेच वरिष्ठांकडे तक्रार न करण्यासाठी डॉ. सोनावणे यांनी आरोग्य सेविकेकडे ११ हजारांची लाच मागितली. परंतु, आरोग्य सेविकेने लाच देण्यास नकार देत याबाबत ठाणे लाचलुचप प्रतिबंधक विभागाकडे लेखी तक्रार केली.

एसीबीने तक्रारीची पडताळणी केल्यानंतर डॉ. सोनावणे यांनी लाच मागितल्याचे निष्पन्न झाले. त्यानंतर एसीबीच्या अधिकाऱ्यांनी  प्राथमिक आरोग्य केंद्रातील कार्यालयात सापळा लावून आरोग्य सेविकेकडून ११ हजारांची लाच स्वीकारताना डॉ. सोनावणे यांना रंगेहात पकडले. वाशिंद पोलिस ठाण्यात गुन्हा दाखल झाल्यानंतर एसीबीने डॉ. सोनावणे यांना अटक केली. त्यांना न्यायालयाने एक दिवसाची पोलिस कोठडी दिली आहे. एसीबीचे पोलिस निरीक्षक स्वप्नील जुईकर या गुन्ह्याचा तपास करीत आहेत.