पुष्पा स्टाईलने गांजाची तस्करी, तब्बल २० लाखांचा मुद्देमाल जप्त; दोन आरोपी उल्हासनगर क्राईम ब्रांचच्या जाळ्यात
नेरळ - बदलापूर रस्त्यावर पुष्पा स्टाईलने गांजाची तस्करी केली जात असल्याची माहिती पोलिसांना मिळाली होती. या माहितीवरून त्यांनी सापळा रचला. यानंतर...
उल्हासनगर : उल्हासनगर गुन्हे शाखेच्या पथकाने नेरळ – बदलापूर रस्त्यावर पुष्पा या चित्रपटाच्या स्टाईलप्रमाणे गांजाची तस्करी करणाऱ्या दोन जणांना अटक केली आहे. या आरोपींनी इनोव्हा गाडीत वेगवेगळ्या ठिकाणी गांजा लपवून ठेवला होता. या कारवाईमध्ये तब्बल २० लाखांचा मुद्देमाल जप्त करण्यात आल्याची माहिती गुन्हे शाखेचे पोलीस उपायुक्त शिवराज पाटील यांनी पत्रकार परिषदेत दिली. पोलिसांनी दिलेल्या माहितीनुसार, नेरळ – बदलापूर रस्त्यावरून टोयोटा इनोव्हा या गाडीमध्ये काही जण लाखोंचा गांजा घेऊन जात असल्याची गुप्त माहिती क्राईम ब्रांचचे शेखर भावेकर आणि राजेंद्र थोरवे यांना मिळाली होती. त्यानुसार पोलीस उपायुक्त शिवराज पाटील, सहाय्यक पोलीस आयुक्त निलेश सोनावणे, वरिष्ठ पोलीस निरीक्षक राजेंद्र अहिरे यांच्या मार्गदर्शनाखाली पोलीस उपनिरीक्षक कैलास इंगळे, श्याम रसाळ, रमेश केंजळे, शेखर भावेकर, राजेंद्र थोरवे, चंद्रकांत पाटील, गणेश गावडे, चंद्रकांत सावंत, सतीश सपकाळे, संजय शेरमाळे या पथकाने सदर परिसरात सापळा रचला.