ईडीची छापेमारी, आता एसआयटी १२ हजार कोटींचा हिशोब मागणार; मुंबई महापालिका चौकशीच्या फेऱ्यात
![](https://dakshpolicenews.com/wp-content/uploads/2023/06/846597-bmc-istock-780x470.jpg)
मुंबई : मुंबई महापालिकेतील १२ हजार कोटी रुपयांच्या कथित घोटाळ्याच्या चौकशीसाठी पोलिस आयुक्तांच्या नेतृत्वाखाली पोलिसांचे विशेष तपास पथक (एसआयटी) स्थापन करण्यात आले आहे. मुंबईचे पोलिस आयुक्त विवेक फणसळकर यांच्या नेतृत्वाखाली हे पथक काम करील.
मुंबई महापालिकेने करोनाच्या काळात केलेल्या सुमारे १२ हजार कोटी रुपयांच्या खर्चाची चौकशी करण्याचे आदेश दिल्यानंतर ‘कॅग’ने याबाबत पडताळणी केली. या व्यवहारात १२ हजार कोटी रुपयांची अनियमितता दिसत असल्याचे ‘कॅग’ने आपल्या अहवालात नमूद केले होते. ‘कॅग’ने ठपका ठेवल्यानंतर या कथित घोटाळ्याचा तपास करण्यासाठी राज्य सरकारने विशेष समिती नेमण्यास मान्यता दिली. मुंबई पोलिस आयुक्तांच्या अध्यक्षतेखाली ही विशेष चौकशी समिती नेमावी, असे आदेश जारी करण्यात आले. त्यानुसार मुंबईचे पोलिस आयुक्त विवेक फणसळकर यांच्या देखरेखीखाली आर्थिक गुन्हे शाखेचे सहआयुक्त निशित मिश्रा, आर्थिक गुन्हे शाखेचे पोलिस उपायुक्त, सहायक पोलिस आयुक्त या अधिकाऱ्यांचे पथक स्थापन करण्यात आले आहे. या एसआयटीमध्ये अन्य अधिकारी आणि कर्मचारी यांचा आवश्यकतेनुसार समावेश करणार असल्याचे पोलिसांनी म्हटले आहे.